काठमाडौं, भदौ २२ (अनलाइन बहस)

काठमाडौ नयाँ बानेश्वर स्थित आनन्दभूमि बिजनेस सेन्टरमा गत सोमबार भदौ २० गते रोटरी क्लब अफ रुद्रमतिमा रोटरी डिस्ट्रिक्ट ३२९२ का वर्ष २०२१/२०२२ का गभर्नर जितेन्द्र बहादुर राजभण्डारीको अफिसियल क्लब भ्रमण सम्पन्न भयो । सो कार्यक्रममा गभर्नर राजभण्डारी लगायत रोटरी डिस्ट्रिक्ट ३२९२ का प्रमुख अफिसियलहरुको सक्रिय उपस्थिति रह्यो । जसमा पूर्व डिस्ट्रिक्ट गभर्नरहरु तिर्थमान शाक्य,  केशव कुँवर,  सञ्जय गिरी,  चिन्तामणि भट्टराई साथै निर्वाचित गभर्नरहरू वर्ष ०२२ /०२३ का राजेन्द्र ढोजू र वर्ष ०२३/०२४ का  राजेन्द्रमान शेरचन पनि सहभागि भए । 
औपचारीक बैठकमा बोल्दै गभर्नरराजभण्डारीले रोटरी क्लब अफ रुद्रमतिलाई एक सफल र उर्जामय क्लबको संज्ञा दिए र सोहि बैठकमा रोटरी क्लब अफ रुद्रमतिका अध्यक्ष  किशोर त्रिपाठीले क्लबले सम्पन्न गरेका आयोजना, चलिरहेका कार्यक्रम तथा आगामी लक्ष्यहरुको जानकारी दिए  । कार्यक्रममा डिस्ट्रिक्टको नेतृत्वको उपस्थितिलाई लिएर क्लव सदस्यहरुले खुशी व्यक्त गर्दै आगामी दिनमा पनि डिस्ट्रिक्टको निरन्तरको सहयोग तथा सदासयताको अपेक्षा गरेको बताए । कार्यक्रममा  रोटरी क्लब अफ रुद्रमतिका सक्रिय सदस्यहरुलाई सम्मान र नयाँ सदस्यहरुलाई स्वागत गरियो ।  
महिला सशक्तिकरण लक्ष्यलाई समेट्दै गभर्नर राजभण्डारीले रोटरीे रुद्रमतिले गरिरहेका सामुदायिक विकासका कार्यक्रमहरु प्रति बधाईका साथै बालिका शिक्षा र विद्यालयमा छात्रा मैत्रि शौचालयको निर्माणमा अग्रसर हुन क्लबको ध्यानकर्षण गराए ।