काठमाडौँ - काठमाडौं महानगरपालिकाको मतगणना जारी छ । पछिल्लो मत परिणाम अनुसार काठमाडौंमा २२ हजार  ५ सय ६४ मत गन्न बाँकी रहँदा प्रमुखका स्वतन्त्र उम्मेदवार बालेन शाहले ५४ हजार ७ सय १८ मत पाएका छन् ।

निर्वाचन अधिकृतको कार्यालय काठमाडौंले आज बिहान सार्वजनिक गरेको तथ्यांक अनुसार १ लाख ९१ हजार १ सय २५ मध्ये १ लाख ६८ हजार ४ सय ८७ मतगणना भएको छ। 

स्वतन्त्र उम्मेदवार शाहलाई पछ्याइरहेकी गठबन्धनका तर्फबाट कांग्रेसकी उम्मेदवार सिर्जना सिंहले ३४ हजार ६ सय ८ मत ल्याएकी छिन् । उनी बालेन भन्दा २० हजार १ सय १० मतान्तरले पछाडि रहेकी छन्।

एमालेका उम्मेदवार केशव स्थापित भने तेस्रो स्थानमा छन् । पछिल्लो मतपरिणाम अनुसार स्थापितले ३३ हजार ९ सय ७५ मत पाएका छन्। यस्तै अर्का स्वतन्त्र उम्मेदवार सुमन सायमीले ९ हजार ९६३ मत ल्याएका छन्।

आयोगका अनुसार अहिले वडा नम्बर १३ कालिमाटी, १४ कालिमाटी, १५ डल्लु, १६ सोह्रखुट्टे र १७ क्षेत्रपाटीको मत गणना भइरहेको छ भने अन्य सबै वडाको गणना सकिएको छ।