काठमाडौँ - स्थानीयवासी निरन्तर प्रतिरोधमा उत्रिएपछि बुधबार फोहोर बोकेर गएका ट्रक बन्चरेडाँडा पुग्न सकेनन्।

प्रहरी खटाएर सुरक्षा दिँदै लगिएका ट्रकलाई सयौँ स्थानीयबासीले सडकमाथिबाट ढुंगामुढा गरेर प्रतिरोधमा उत्रिएका थिए। फोहोरका गाडीलाई सुरक्षा दिन बन्चरेडाँडा क्षेत्रमा दुई सयभन्दा धेरै प्रहरी तैनाथ भएका थिए।

त्यसक्रममा सडकमाथि उक्लिएका स्थानीयले ढुंगामुढा गर्दा तीनजना प्रहरी घाइते भएका महानगरीय प्रहरी परिसर काठमाडौंका प्रवक्ता एसपी दिनेशराज मैनालीले बताए।

फोहोर बोकेका गाडी बन्चरेडाँडा पुग्न नपाएपछि अहिले त्यहाँ काठमाडौंबाट नेपाल प्रहरी र सशस्त्र प्रहरीको थप टोली पठाइएको छ।