काठमाडौँ, असार १९ (रासस)
दाङमा मोटरसाइकल दुर्घटनामा परी गम्भीर घाइते भएका एकजनाको आज उपचारका क्रममा मृत्यु भएको छ  मृत्यु हुनेमा तुलसीपुर उपमहानगरपालिका–११ उरहरीका ५५ वर्षीय खोपिराम अधिकारी हुनुहुन्छ । 

उहाँको  शिक्षण अस्पताल  कोहोलपुरमा उपचारका क्रममा आज बिहान मृत्यु भएको इलाका प्रहरी कार्यालय तुलसीपुरले जनाएको छ । उहाँको टाउको र अनुहारमा चोट लागेको थियो । 

अधिकारी आधारभूत विद्यालय कटाहाका प्रधानाध्यापक हुनुहुन्छ । गत शुक्रबार बिहान दुई मोटरसाइकल एकापसमा ठोक्किँदा उहाँसहित चारजना घाइते हुनुभएको थियो ।

तुलसीपुर–अमेलिया सडकखण्डअन्तर्गत तुलसीपुर उपमहानगरपालिका–६ बुद्ध चोक नजिकै रा१प ८४४६ नंको मोटरसाइकल र रा४प २८६६ नम्बरको मोटरसाइकल एकापसमा ठोक्किँदा दुर्घटना भएको थियो ।