काठमाडौँ - सत्तारुढ नेकपा (एकीकृत समाजवादी) को पहिलो केन्द्रीय परिषद् बैठक आज (सोमबार) प्रज्ञा प्रतिष्ठानमा बस्दै छ ।

आजको बैठकमा पार्टीको देशभर भएका साङ्गठनिक गतिविधि, स्थानीय तहको चुनावको समीक्षा, आगामी प्रतिनिधिसभा र प्रदेशसभा निर्वाचनका लागि चुनाव लक्षित कार्यक्रम, हालै सम्पन्न केन्द्रीय कमिटीको बैठकमा प्रस्तुत भएका केही प्रतिवेदनमा छलफल गरिने प्रचार विभाग उपप्रमुख शम्भु श्रेष्ठले जानकारी दिएका छन् ।

त्यसैगरी पार्टीका महासचिव डा. बेदुराम भुसालको राजनीतिक प्रतिवेदनमा विशेष छलफल गरिने कार्यक्रम छ । मुलुकमा संविधान र राजनीतिक व्यवस्था संरक्षणका लागि तत्कालीन नेकपा (एमाले) बाट विद्रोह गरी सो पार्टी स्थापना गरिएको, कम्युनिष्ट आन्दोलनमा देखापरेको विसर्जनवाद र अवसरवादका विरुद्ध जनतालाई एकताबद्ध गर्न पार्टीको औचित्य र आवश्यकता तथा आगामी कार्यदिशाबारे प्रतिवेदनमा उल्लेख छ ।

देशभरबाट करिब एक हजार ५ सय सहभागी हुने परिषद् बैठकको पार्टी अध्यक्ष माधवकुमार नेपालले शुभारम्भ गर्ने छन् । नेकपा एसबाट हिजो मात्र चार मन्त्री सरकारबाट बाहिरिएका छन् भने पाँच नयाँ मन्त्री नियुक्त भएका छन् । प्रधानमन्त्री शेरबहादुर देउवाले हिजो साँझ मात्र नेकपा एसका पाँच मन्त्री नियुक्त गरेका हुन् । पुरानालाई फिर्ता बोलाएर नयाँ मन्त्री नियुक्ति भएको सन्दर्भमा यस विषयमा पनि समीक्षा हुने नेताहरु बताउँछन् ।